GENERAL SANTOS CITY – Nagpadayon pa ang imbestigasyon sa Tambler PNP sa natigayong pagpamusil sa usa ka boat captain sa usa ka fishing company sa Calumpang Avenue, Purok Catapang Heights, Brgy. Calumpang ning syudad.
Sa nadawat nga report sa buhatan ni Police Major Yol Hilado sa maong presinto, ang usa ka nagpangalan og Richard Mendoza, 42-anyos, residente sa Zone 1, Saeg, Brgy. Calumpang, GenSan ang biktima.
Sa inisyal na imbestigasyon, samtang ang biktima nagmaneho sa iyang trisikel sa may Calumpang Avenue gipusil ang nasampit sa mga suspek nga sakay sa motorsiklo.
Nakaangkon ug duha ka samad pinusilan sa liog ang biktima nga gilayong gidala sa tambalanan.
Narekober sa crime scene ang 2 fired cartridge cases sa suspected caliber .45 pistol.
Human sa insidente, paspas nga misibat ang riding in tandem suspects sakay sa ilang motorsiklo.
