GENERAL SANTOS CITY – Kasong murder ug kalapasan sa Sec. 11 sa Art. II sa Republic Act 9165 o Comprehensive Dangerous Drugs Act of 2002 ang ipasang-at batok sa usa ka trabahante sa umahan human nga gidunggab ang kauban sa trabaho hinungdan sa kamatayon sa biktima.
Himas-rehas na karon ang suspek nga giila nga si Arman Dinang Bontang , 42-anyos ug residente sa Cordova Farm nga nahimutang sa Purok Masikap, Brgy Pagalungan, Polomolok, South Cotabato nga nasikop atol sa gipahigayong hot pursuit operation sa kapulisan.
Subay sa imbestigasyon sa Polomolok Municipal Police Station, una ang insidente, nag-andam ang biktima nga si Jun Tacyawan Taño , 57 anyos ug apo niini alang sa birthday sa usa pa niini ka apo sulod sa Cordova farm dihang niabot nga may bitbit nga ilimnong makahubog ug pagkaon ang suspek.
Apan dihang duol na lamang kini sa biktima kalit lang niining gidunggab ang nahisgutan.
Gilayong misibat ang suspek human ang insidente apan nasikop.
Gidala pa sa ospital ang biktima, apan gideklara nga patay na sa attending physician.
Narekober sa posisyon sa suspek dihang nasikop ang duha ka heat sealed sachet sa gituohang shabu.
Apan ang kutsilyo nga gigamit sa suspek ang wala nakit-an human niini gilabay.
