Nanawagan og patas nga pagtagad sa paghatag og financial assistance ang mga trisikad driver, kasunod sa padayong pagsaka sa presyo sa lana nga nakaapekto usab sa ilang panginabuhian.
Matud ni Reymund Rosario, usa ka trisikad driver, nga dako usab ang ilang giatubang nga kalisod sa adlaw-adlaw tungod sa mahal nga gasolina, parehas sa kahimtang sa mga tricycle driver.
Gipasabot ni Rosario nga bisan og ginagmay lamang ang ilang kita, dako gihapon ang ilang gasto sa krudo aron mapadagan ang ilang panginabuhian, hinungdan nga usahay kulang pa ang ilang madala nga kita para sa panginahanglan sa pamilya.
Tungod niini, iyang gihangyo ang gobyerno nga apilon sila sa paghatag og financial assistance aron matabangan ang ilang sektor nga naglisod usab sa kasamtangang sitwasyon.
Samtang nagpadayon ang pagsaka sa presyo sa lana, nagpadayon usab ang panawagan sa ubang gagmay’ng drayber nga mahatagan og patas nga suporta aron makasugakod sa nagkataas nga gasto sa ilang operasyon.
