Nanawagan si Atty. Jong Gonzalez sa katawhan, ilabi na sa mga tricycle driver, nga lihokon na ang ilang aplikasyon alang sa pagkuha og prangkisa aron malikayan ang kasamok sa operasyon.
Matod pa ni Gonzalez, dugay na kini nga gikasabutan ug gihatagan na og igo nga panahon ang mga drayber aron makompleto ang proseso.
Giingon niya nga kung mapugos ang ilang buhatan sa pagpangdakop, dili na kini ikabasol sa lokal nga pangagamhanan tungod kay klaro na ang mando ug kasabutan bahin niini.
Dugang pa niini, padayon gihapon ang ilang opisina sa pagserbisyo sa mga drayber ug operators nga interesado nga makakuha ug franchise.
Giawhag usab ang tanan nga dili maglangan-langan ug muadto dayon sa buhatan aron maproseso ang ilang mga papeles.
Gilauman nga pinaagi sa maong kampanya, mas mapaayo ang regulasyon sa operasyon sa mga tricycle sa syudad ug malikayan ang mga ilegal nga byahe nga makaapekto sa kaluwasan ug kahimtang sa transportasyon.
