GENERAL SANTOS CITY – Gibutyag ni City Health Officer Dr. Jet Oco nga may uban pang paagi nga gihimo ang ilang buhatan aron makab-ot ang panganadoy nga tanan gayud nga bata nga singko anyos paubos ang edad ang mahatagan ug polio vaccine.
Matud pa ni Dr. Oco nga nakig-alayon sila sa kapulisan sa syudad aron magpahigayon og pagpatulo og polio vaccine sa checkpoints.
Pinaagi sa mga nurse sa kapulisan maghatag ug bakuna kontra polio sa mga bata., Tumong niini nga ang tanang bata nga gisulod o migawas ang gensan ang mabakunahan gayud.
Gawas sa pagpahigayon og house to house vaccination, may kan-anan usab nga misugot sa hangyo sa City Health nga adunay ipahigayon nga paghatag ug polio vaccine sulod sa ilang lugar.
Matud pa ni Dr. Oco nga mahimo usab nga dalhon sa mga inahan ang ilang anak sa health centers aron matagaan ug bakuna kontra polio.
Giklaro niini nga walay overdose sa polio vaccine hinungdan nga mahimo gihapon nga mag-papatak sa polio vaccine ang inahan sa ilang anak bisan nga napabakunahan na kini sa una nga wala pa ang ‘Sabayang Patak kontra polio’ nga gipahigayon karon sa DOH.
Naninguha ang CHO nga makab-ot ang target nga 75,000 ka mga kabataan nga mabakunahan dinhi sa syudad.
