GENERAL SANTOS CITY – Napasang-at na ang kasong murder sa korte batok sa tulo ka mga suspek sa pagpatay kang Eduardo Dizon, anchorman sa usa ka estasyonan sa radyo sa Kidapawan City.
Ang kaso ang napasang-at kagahapong adlawa subay sa impormasyon gikan sa Presidential Task force on Media Security (PTFoMS).
Gipasang-at ni Mariam April Mastura-Linsangan, acting city prosecutor sa Kidapawan City ang kasong murder sa Regional Trial Court (RTC) sa Kidapawan City nga may Criminal Case No. 5281-2019.
Ang mga nakasuhan mao silang Junell Jane Andagkit Poten alias Junell Gerozaga, Sotero Jacolbe, Jr. alias Jun Jacolbe, ug Dante Encarnacion Tabusares alias Bong Encarnacion.
Si Tabusares ug Jacolbe ang susamang broadcasters.
Ang tulo ang nagkuntsabo ug nagplano sa pagpatay kang Dizon kansa gipusil ug pipila ka higayon ug namatay niadtong July 10, 2019.
Kahibaluan nga si Dizon ang usa sa mga gasaway sa operasyon sa Kabus Padatuon o KAPA nga gimugna ni Joel Apolinario.
