GENERAL SANTOS CITY – Gisampolan ni Police Chief Supt. Marcelo Morales, regional director sa Police Regional Office 12, ang pagguba sa walo ka mga slot machine o tolendoy nga nakumpiska sa nagkadaiyang presinto dinhi sa siyudad.
Kini atubangan mismo sa mga sakop sa media, sa Camp Fermin G. Lira, kagahapong adlawa.
Sa karon, wala matud pa silay gihuptan nga pangalan sa tag-iya sa nahisgutang mga slot machines, apan gipasalig nga magpadayon ang ilang kampanya batok sa nahisgutang mga iligal nga sugal, kung asa mga bata ang sagad nga nagumon.
Dungan niini, gipahimangnuan ni Gen. Morales ang mga sindikato o kinsa man nga nagpaluyo sa operasyon sa tolendoy dinhi sa siyudad nga dili nila santuhon, inay pasakaan gayud ug kaso.
Ug kon masayran ug mapamatud-an nga may nalambigit nga mga pulis, gipaniguro ni Gen. Morales nga dili siya magduha-duha nga kasuhan gayud ang mga nasampit.
