GENERAL SANTOS CITY – Giawhag sa lokal nga gobyerno sa dakbayan ang publiko nga aduna pay higayon hangtod ugma aron mubisita sa mga pribado og pampublikong sementeryo, columbarium, og memorial park aron malikayan ang pagdagsa o pagdungan-dungan sa mga muadto sa mga nasampit nga lugar.
Gibutyag ni Mary Ann Bacar, ang administrador sa Antonio C. Acharon Memorial Park (ACAMP) nga dili pasudlan ang mga sementeryo sa dakbayan sugod karong Oktubre 29 hangtud Nobyembre 4 tungod siradhan kini sa publiko.
Sa mga mubisita sa ACAMP karong adlawa hangtud ugma Oktobre 28 aron managkot, maghalad ug bulak og pag-ampo, abli kini sugod alas 5:00 sa buntag hangtod alas 6:00 sa gabie lamang.
Sa pamahayag ni P/Lt Col. Lino Capellan, tigpamaba sa Police Regional Office 12 nga gipasiguro ni OIC-City PNP Director P/Col. Gilberto Tuzon sa mga city og provincial directors sa katibuk-ang rehiyon nga padayong tutukan ang paghatag og seguridad sa mga muadto sa mga minahal sa kinabuhi nga mipanaw na sa laing kalibutan.
Gibutyag ni Capellan nga sa mga muadto sa sam-ang, kinahanglang sundon ang mga health protocols kalabotan sa covid 19 og ang mga gipatumang patakaran sa mga sementeryo.
