GENERAL SANTOS CITY – Milibot sa mga municipal police station ang mga sakop sa Human Rights sa South Cotabato Police Provincial Office aron susihon ang kahimtang sa mga piniriso sulod sa selda.
Gipangunahan ni Police Captain Juvelyn Carbonell, Provincial Human Rights Officer ang pagpahigayon ug komprehensibo nga pagsusi sa mga custodial facilities sa lima ka Municipal Police Stations.
Sa maong higayon aktuwal nga gi-ihap sa taga Human Rights ang mga priso sulod sa selda ug gitandi ang maong ihap sa listahan sa custodial officer aron masiguro nga tanan nga priso ang naa sulod sa selda.
Laing tumong sa pagbisita sa grupo mao nga masiguro ang seguridad sa mga pasilidad ug mabantayan ang mga katungod sa mga person deprived of liberty(PDL) samtang kustodiya sa mga otoridad.
Gilangkoban kini sa Tantangan Municipal Police Station, Banga, Surallah, Sto. Niño ug Norala Municipal Police Station.
Hinuon walay gipagawas nga komento ang maong buhatan kalabutan sa mga bayolasyon nga ilang nakita.
