GENERAL SANTOS CITY – May lead na ang mga imbestigador sa Polomolok Municipal Police Station sa ilhanan sa mga responsable sa pagpusil-patay sa kanhi nilang deputy chief nga si P/S/Insp. Hernan Gabat, kaniadtong Setyembre 26 ning tuiga.
Kini ang gibutyag sa Bombo Radyo ni P/S/Insp. Romeo Albano, ang kasamtangang deputy chief sa nasampit nga presinto.
Sumala pa nga may mga personalidad na silang natumbok nga posibleng may kalabutan sa pagpatay kang Gabat, apan mibalibad nga maghatag ug dugang detalye, aron dili mabulabog ang imbestigasyon, kalabot sa mga ginatumbok nga nagpaluyo sa nasampit nga krimen.
Sa karon padayon matud pa sila sa ginapahigayong lawom nga imbestigasyon, ug gipaninguha nga mailhan na usab ang mismong gunman nga mipusil-patay kang anhing P/S/Insp. Gabat, aron dili ma-dismiss ang kaso ug mapanubag gayud ang mga responsable.
Kahinumduman nga gawas sa nasampit nga opisyal, may lain pang upat ka mga biktima ang namatay human maangin sa insidente.
