GENERAL SANTOS CITY – Gikatakda nang kasuhan ang mga responsable sa labing ulahing pagsunog sa usa ka unit sa Yellow Bus Line nga may body number nga A-69, sa Nalus, Kiamba, Sarangani Province.
Kini ang gibutyag ni Police Supt. Romeo Galgo, tigpamaba sa Police Regional Office 12.
Gikabutyag nga mga miyembro gihapon sa rebeldeng NPA ang natumbok nga suspek sa maong insidente, ug padayon ang pagpangalap ug dugang ebidensya alang sa pagpasang-at ug kaso sa mga wala gihinganlan nga mga suspek.
Extortion matud pa ang gitutukan nilang motibo sa maong pagpanunog ug bus.
Gumikan niini, mas gipahugtan pa sa kapulisan ang gipatuman nga seguridad sa mga gabiyahe nga bus sa Rehiyon 12, pinaagi sa pagbutang ug mga marshall sa matag bus, aron dili na masubli ang susamang insidente.
