GENERAL SANTOS CITY – Plano nga ipatawag sa barangay Buayan ang tag-iya sa luna nga tinubdan sa baho nga nasimhutan sa daghang residente palibut sa barangay Buayan ning syudad.
Kini ang pahayag ni Barangay Kagawad Beltran Otanes human personal gipangita ang gigikanan sa baho nga pipila ka adlaw na usab nasimhutan sa mga residente.
Una nga giadtu-an ang usa ka punong kon fishpond sa Purok 5 apan wala matud pa didto ang gireklamo nga baho samtang may mipaabut ug impormasyon nga gikan matud pasa tonwnsite ang nahisgutang baho nga gipadpad tungod sa hangin nga amihan.
Sumala sa nahisgutang opisyal ipadayon nila ang pagpangita niini busa nananawagan sa mga residente nga itudlo ang tinubdan sa baho aron mahatagan ug action sa barangay.
Nasuta nga sa Barangay Buayan daghang residente nanginabuhi sa pagbulad ug isda nga lopoy ug hipon.
