GENERAL SANTOS CITY – Kung sa Pilipinas, daw sa gaundang ang pagtuyok sa kalibutan sa mga Pinoy kon may away si Sen. Manny Pacquiao, susama usab matud pa sa France kon may dula ang ilang national football team sa FIFA World Cup.
Ingon niini gihulagway ni Chelyn Saez, taga-GenSan nga naka-minyo ug usa ka Pranses ug didto karon gapuyo sa Paris.
Kini hilabi na nga sulod sa finals sa FIFA World Cup ang France, nga 1998 pa ulahing nakadula sa Finals sa maong torneyo.
Sa pakighinabi sa Bombo Radyo, gibutyag ni Mrs. Saez nga ang mga Pranses hilabihan gayud ka mga football fanatic.
Ug gani, bisan matud pa ug dili nila team, gatan-aw gayud sila sa dula. Hinungdan nga lauman nga musamot na karon nga mudula sa finals ang France, ug makaatbang ang Croatia sa adlaw’ng Dominggo.
Sa karon, mabati gayud matud pa ang pagmaya sa katawhan sa maong nasud.
Matud ni Mrs Chelyn Saez, napuno na matud pa ug flag sa France ang gawas sa mga panimalay, apil sa mga public transportations, may mga pahinumdum nga suportahan gayud ang ilang team.
Samtang sa adlaw’ng Dominggo, atul sa dula, lauman matud pa nga mapuno na usab ang mga kadalanan, hilabi na ang Champs Elysées Avenue, kung asa may mga screen alang sa free-viewing sa dula, ug makita nga bongga gayud ang ilang mga pagpangandam samtang gatan-aw sa dula.
Able usab ang tanang bar ug restaurants nga lauman usab nga mapuno gumikan may free-viewing sa dula.
Hinungdan nga bisan sila nga mga Pinoy ang ga-cheer ug gasuporta na usab sa Team France.
