Gikumpirma sa Philippine Embassy sa Qatar nga walay Pinoy nga naangol sa Israeli airstrike sa dakbayan sa Doha sa miaging adlaw.
Gikataho nga gipunting sa opensiba ang daghang mga lider sa Hamas nga temporaryong nagpuyo sa nasud.
Gikataho nga naluwas ang mga sakop sa pag-atake.
Bisan kung luwas ang mga kababayang pinoy, ang embahada nanawagan alang sa padayon nga pag-amping taliwala sa mga tensiyon sa rehiyon.
Ang Department of Foreign Affairs (DFA) padayon nga nagmonitor sa sitwasyon aron masiguro ang kaluwasan sa kapin 260,000 ka mga Filipino nga nagpuyo sa Qatar.
Si Bombo International News Correspondent Joseph Rivera nitaho nga daling miresponde ang mga awtoridad sa Qatar human sa pagbuto.
Gilayon usab nga gicordon ang lugar ug giproseso ang mga napatay nga sundalo.
Gitambagan ang mga Filipino nga likayan ang paggawas ug di kinahanglan, magpabiling alerto sa mga balita ug abiso gikan sa lokal nga mga awtoridad, ug kontrakon dayun ang embahada alang sa bisan unsang emerhensya.
