GENERAL SANTOS CITY – Gitambagan karon sa ilang mga amo ang mga Pinoy hilabi na ang mga OFW sa Hong Kong nga dili una muggawas-gawas aron dili maangin sa halapad nga lihok-protesta batok sa extradition bill nga gipamugos nga iduso sa ilang nasud, kung asa kon makasala ang taga-Hongkong, didto dal-on sa China aron taralon.
Kini ang gibutyag ni Bombo correspondent Rhes Betonio, taga-GenSan ug kasamtangang nag-trabaho didto sa Hong Kong.
Kini matud ang tambag sa Philippine Embassy sa ilang mga employers.
Sumala pa nga hilabihan gayud kagubot ang central area sa Hong Kong, kung asa galabayanay ang mga raliyesta ug bisan unsang butang.
Kahibaluan nga giharang sa mga raliyesta ang halos tanang government headquarters hinungdan nga napugos ang mga magbabalaod nga temporaryong isibog ang angayan untang debate nga matigayon kalabot sa kontrobersiya.
Ginahadlok usab sa mga nagprotesta ang kapulisan nga mugamit sila ug pepper spray kung padayon silang harangon sa mga nahisgutan.
