GENERAL SANTOS CITY – Miubos ang ihap sa mga pasahero nga midagsa sa Bulaong Terminal, sa Semana Santa ning tuiga.
Sa pakighinabi sa Bombo Radyo, gibutyag ni Jong Facurib, labaw sa Bulaong Terminal, nga mas ubos ang natala nga pasahero miaging tuig, sukwahi sa ilang gilauman, kung asa alang kaniya, daw sa normal lang nga adlaw ang gidaghanon sa mga pasahero nga midagsa sa nahisgutang terminal ning tuiga.
Pinakadaghan matud pa ang ilang natala kaniadtong Miyerkules Santo, kung asa mukabat sa 11,000-12,000 ka pasahero ang ilang natala, nga mas miubos pa sa mga misunod nga adlaw hangtod kagahapong adlawa.
Nagpasalamat usab si Facurib nga nahimong luwas ug hapsay ang sitwasyon sa terminal kaniadtong Semana Santa.
Gawas sa kapulisan, kasundaluhan, CSU members, ug uban pang force multiplier lakip ang CCTV cameras, gipasalamat usab ni Facurib ang tanan nga nagtinabangay, mga stakeholders, vendors, porters, dispatchers, tricycle driver, lakip ang mga pasahero, gumikan sa gikinabuhi ang “security is everybody’s concern,” hinungdan nga wala nahimong lisod ang pagbantay sa seguridad ug kahapsay sulod sa terminal.
