GENERAL SANTOS CITY – Gipasalamatan ni Grace Morales, misis ni Russel Morales nga usa sa mga mamahayag nga biktima sa Ampatuan Massacre, ang tanan nga padayong nagsuporta kanila nga mga pamilya sa mga biktima, sa ilang pakigbisog alang sa pagkab-ot sa hustisya.
Atul kini sa natigayong simpleng programa dungan sa misa sa Forest Lake Cemetery, kung asa 12 sa mga biktima ang nakalubong, alayon sa paghinumdum sa ikawalong anibersaryo sa nasampit nga masaker, kagahapong adlawa.
Gipasalamatan usab ni Morales ang ubang pamilya nga sama kanila, nagpabilin ug nagpadayon sa pakigbisog nila. Sumala pa nga kaniadtong Nobyembre 17, may gipahigayong case update ngadton kanila ang NUJP, human sa duha ka tuig nga wala silay nadunggan kalabot sa dagan sa kaso.
Base sa naasoy’ng update, mukabat na matud pa sa 115 ang nabilanggo, kung asa 113 niini ang na-arraign, ug 112 ang accused arrested, human nga may tulo nga namatay tungod sa sakit lakip si Andal Ampatuan Sr., ug usa nga miambak matud pa gikan sa bilangguan, ug may usa nga na-discharge. May nakapiyansa nga mao si Datu Sajid Ampatuan, butang nga ilang gikatingad-an matud pa, apan nagtuo nga gumikan kulang ang mga ebidensya nga napresenta sa korte.
Aduna usay tulo ka CVO nga wala naapil sa kaso, hinungdan nga anaa na lamang sa 102 ang kasamtangang anaa sa bilangguan, gikan sa kinatibuk-ang 196 nga ihap sa gitudlong suspek.
Samtang, kalabot kang Andal Sr. nga namatay sa sakit, luyo nga mawala matud pa ang criminal case tungod sa iyang kamatayon, gibutyag ni Grace Morales nga singlon gihapon nila nga mga pamilya ang alang sa civil case, sa gihimong pagpatay sa ilang mga mahal sa kinabuhi.
Dungan niini, gihingusgan ni Morales nga ang pagkadelatar sa dagan sa kaso ang dili tungod sa ilang kampo sa mga biktima ug kakulangon sa ebidensya, inay sa gihimong delaying tactics sa kampo sa mga Ampatuan.
Tumong matud pa niini aron mawad-an ug paglaum ug gana ang pamilya sa mga biktima sa pakigbisog sa kaso.
Gibutyag usab matud pa kanila sa usa sa ilang mga abugado nga si Atty Nena Santos nga may na-resolve na ug pwede nang magdesisyon ang huwes, apan may ginahulat matud pang pwedeng dugang nga ipresenta batok sa kampo sa mga suspek.
Samtang, kaniadtong Nobyembre 20, human sila misaka sa massacre site kaniadtong petsa 19, nakigkita matud pa sila kang DOJ Sec. Vitaliano Aguirre II sa Kauluhan.
Gipasalig matud pa kanila sa naasoy’ng opisyal nga tutukan niini ang kaso, ug paningkamutan nga sa iyang termino isip labaw sa DOJ, may mahukman na nga mga suspek, bisan ug anam-anam lang.
Nasayran nga miadto usab sila sa Kongreso, kung asa misuporta sila sa privilege speech ni Rep. Toto Mangudadatu, aron mapadangat sa panggamhanan ang mulo nila alang sa pagkab-ot sa hustisya alang sa ilang mga mahal sa kinabuhi.
