SARANGANI – Padayon ang relief operation sa mga opisyal sa Alabel, Sarangani Province human nga naapektuhan ang duha ka barangay sa ilang lugar sa buhawi.
Base sa report nga apektado ang Purok 5 Latian Brgy Tokawal og Purok 1 Brgy Domolok sa paghapak sa kusog kaayong hangin.
Sa Purok 5 Latian, anaa sa 13 ka balay ang totally damage, 15 ang partially damage og may usa ang nasandam nga nailhan nga si Jaime Denjumia, 53 anyos samtang sa Prk 1 Domolok, anaa sa usa ka balay ang totally damage samtang duha ka balay ang partially damage, samtang may usa ka Madraza School sa Prk 3 Talik ang partially damage.
Sa exclusive interview sa Bombo Radyo, gibutyag ni Jun Llavado, residente sa Purok Latian Tokawal nga alas 2:30 sa hapon nagsugod ang ulan nga gisundan dayon og kusog kaayo nga hangin. Sa iyang pagsusi sa palibot human ang kusog nga hangin, daghang lubi og uban pang pananom ang natumba og daghang balay usab ang nangaguba.
Sa gilusad nga assessment, gikabutyag nga anaa sa P88,000.00 ang kantidad sa mga totally damaged nga panimalay ug P51,000.00 ang partially damaged.
Sa kinatibuk-an may P139,000.00 ang kantidad sa kadaot sa imprastraktura sa duha ka barangay.
