GENERAL SANTOS CITY – Naka-dayoff ang halos tanang mga Pinoy sa Hong Kong kagahapong adlawa, sa nahimong pakigkita ni Pangulong Rodrigo Duterte sa Filipino community.
Kini ang gibutyag ni Teresa Betonio Tenerife, taga-Brgy Bula ning dakbayan, ut upat ka tuig nang nagtarbaho isip yaya didto sa Hong Kong.
Matud kang Tenerife, hilabihan ang ilang kalipay isip mga OFW sa pagbisita ug pakigkita kanila ni Pangulong Duterte, aron personal nag mapaminawan ang ilang tagsa ka mga mulo.
Kahibaluan nga si Tenerife ang miyembro sa Bisdak (Bisayang Dako) Group, usa ka rehistradong grupo sa mga OFW nga gilangkuban sa halos mga taga-Mindanao.
Ang naasoy’ng grupo ang usa sa mga gapahigayon ug mga lihok-protesta aron mapadangat ang ilang mga mulo.
Gumikan niini, galaum matud pa sila nga matabangan ug mahatagan ug solusyon ang ilang mga concerns.
Lakip na niini ang mga nakasinati ug pagpangabuso sa ilang employer, ug handom usab nilang mahatagan ug paigo nga benepisyo ug sweldo.
