Ang pagsaulog sa ika-88 nga Adlaw sa Dabaw maoy naghatag ug dalan sa mga Dabawenyong dumadapig ni kanhi Presidente Rodrigo Duterte sa pagpadayag sa ilang panawagan nga ibalik siya sa Pilipinas, kinsa anaa karon sa kustodiya sa International Criminal Court (ICC) sa The Hague, Netherlands, aron atubangon ang kasong “crimes against humanity.”
Matud sa taho sa Bombo Radyo Davao nga muabot ngadto sa 30,000 ka mga supporters sa kanhi presidente ang mitambong ug miduyog sa unity and solidarity walk, ingon man sa parada, base sa pamahayag sa kapulisan.
Sa kalambigit nga programa, mihatag usab og direktang mensahe si Davao City Mayor Sebastian “Baste” Duterte batok kang Presidente Ferdinand “Bongbong” Marcos, Jr. Gitunglo usab ni Mayor Baste si PBBM sa dihang nahinumduman ang paglubong sa kanhi presidente ngadto sa amahan ni PBBM nga si kanhi Presidente Ferdinand Marcos, Sr. sa Lubnganan sa mga Bayani.
