GENERAL SANTOS CITY – Nagpahimangno si P/Brig.Gen Bernard Tambaoan, deputy regional director for Administration sa Police Regional Office (PRO)12 sa mga sakop sa kapulisan sa rehiyon ingon man sa mga sektor kung asa nag-agi ang proseso sa recruitment sa mga gustong mamahimong pulis nga dili magpasuhol.
Kini human nga gibutyag sa nasampit nga opisyal nga walay gakahitabo sa PRO 12 nga mga palakasay o padrino system sa kinsa man nga indibidwal nga gustong musulod sa organisasyon.
Isip chairman sa Regional screening committee sulod sa 16 ka bulan, gibutyag niining walay nahitabo nga susamang sistema apan kung adunay mareport nga susama niini gilayon niining paimbestigahan.
Gihingusgan ni Tambaoan nga ang aplikasyon sa gustong mahimong pulis muagi sa PNP recruitment evaluators gawas nga daghang proseso ang agian.
Dili mahimong maimpluwensyahan sa bisan kinsa nga PNP official ang rating sa usa ka aspiring police aron makasulod sa PNP bisan wala makapasa sa mga kwalipikasyon sa PNP.
Sa nahimong pamahayag ni PNP Chief, Police General Guillermo Eleazar nga kinasing-kasing niining undangon ang padrino system aron magpatigbabaw lamang ang katakos sa usa ka aplikante.
