GENERAL SANTOS CITY – Kutob na lamang Septembre trese makapaninda ang mga vendor sa Pedro Acharon Boulevard atubang sa kanhi oil depot sa Bula ning syudad.
Kini human nagpadala ug abiso ang barangay Bula ngadto sa labaw sa kapulisan sa syudad Col. Nicomedes Olaybar isip tubag gipadala usab sa opisyal ang labaw sa Traffic Enforcement Unit nga si Police Major Oliver Pauya ug usa-usa nga gi-estorya ang mga nanag-iya sa stall nga gapaninda ug prutas, softdrinks ug uban pa.
Gipadangat ni Major Pauya ang kamandu-an sa syudad ug sa Barangay nga kutob na lamang Septembre 13, 2023 ang ilang pagpaninda.
Matud ni Pauya nga kung maabtan ang mga vendor sa demolition team sigurado nga kumpiskahon ang ilang mga paninda ug maisyuhan pa ug tiket.
Nasuta nga sa maong lugar daghan ang nakaparada nga sakyanan nga may karga nga lain laing matang sa prutas lakip na ang pundok sa mga softdrinks.
Usa sa dili gusto mahitabo sa kapulisan nga adunay madisgrasya u mabanggan sa mga mamalitay u kaha sa mga naninda sa lugar gumikan naa lamang kilid sa dalan ang ilang gikahimutangan.
Nasuta nga sa maong dalan gihimo na lamang paradahan sa mga guba nga trailer ug dagkong sakyanan nga nagakarga ug softdrinks.
