Andam si Philippine gymnast coach Allen Aldrin Castañeda nga modawat sa dugang mga atleta aron mabaid sa ilang talento ug mahisama kang 2-time Olympic Gold Medalist Carlos Yulo.
Si Castañeda kinsa nagsilbing personal coach ni Yulo maoy nahimong yawe aron makab-ot sa atleta ang iyang gipangandoy nga mga medalya sa Paris Olympics.
Sa milabay’ng adlaw gibisita nila Yulo ug sa iyang coach ang Cebu Gymnastics Academy sa Labangon Elementary School,Cebu City.
Una niini, gitug-an ni Castañeda, gidawat ang hagit ni Philippine Sports Commissioner Edward Hayco nga tabangan ang RP team aron makakuha kini og ‘spot’ sa Olympics.
Busa, bisan layo pa ang 2028 Los Angeles Olympics, gipangandaman na niini ang pagbaid sa abilidad sa nga ‘aspiring national athletes’ sa nasud. Una niini, gihatagan sa heroes welcome ang nasampit nga coach sa Brgy Hipodromo,Cebu City nga iyang yutang natawhan.
