GENERAL SANTOS CITY – Tulo ang sikop, usa ang patay human ang simultaneous implementation sa 14 ka search warrants sa pagpanguna sa Philippine Drug Enforcement Agency (PDEA12), kaniadtong Lunes, sa Kabacan, Cotabato Province.
Giila ang mga nasikop nga silang Akmad Blah, 22-anyos; Abdul Angkanan, 44, driver, managsamang residente sa Tandang Sora Extension, Brgy. Poblacion, Kabacan; ug si Ali Beldik, 28-anyos, residente sa Sitio Lote, Brgy. Kayaga, Kabacan.
Narekober gikan sa ilang panimalay ang kinatibuk-ang 15 sachets sa shabu nga gibanabanaang anaa sa 5.5 grams ug may estimated value nga P27,500.
Kinse ka sachet usab sa shabu nga anaa sa 4 grams ug may market value nga P20,000, ug pipila ka drug paraphernalia ang narekober sa lain pang search warrant nga gipahigayon sa Purok 1, Brgy. Poblacion, Kabacan, kung asa target silang Benzar Beldik ug Beldik Usop.
Apan napusilan-patay sa mga pulis si Usop human matud pa mibunlot ug .38 revolver.
Samtang si Benzar Beldik ang nakaikyas sa kamot sa mga awtoridad. Base sa report, ang mga suspek ang miyembro sa organized crime group, nga nalambigit dili lang sa illegal drug trafficking inay lakip sa carnapping, robbery ug pagpangawat sa probinsya sa Cotabato.
Nag-atubang karon ang mga nasampit ug kasong pagsupak sa Section 11 (Possession of Dangerous Drugs), sa RA 9165 o Comprehensive Dangerous Drugs Act of 2002.
