GENERAL SANTOS CITY – Dismayado ang mga miyembro sa Kabus Padatuon o KAPA Community Ministry International Inc. nga mitambong sa natigayong prayer rally sa Acharon Sports Complex dinhi sa siyudad, human matud pa nga gipalaum lang sila sa ilag founder nga si Joel Apolinario.
Kini human nga una nang gipasalig kanila ni Apolinario nga “okay” na kang Pangulong Rodrigo Duterte ang nasampit nga investment group una pa man ang pag-abot sa pangulo sa siyudad, Huwebes sa hapon, alang sa pagpanghatag sa 13,000 certificate of land ownership award (CLOA) sa mga agrarian reform beneficiaries.
Kahinumduman nga sayong nagmaya ang mga KAPA members human mikatag ang report nga matud pa nagkaistorya na silang Pangulong Duterte ug si Apolinario, ug gibutyag nga gitugtan na sa punong ehekutibo nga magpadayon operasyon sa maong investment group.
Misamot pa ang ilang paglaum dihang miabot sa prayer rally si Apolinario sakay sa chopper, nga pipila ka minuto lamang nga nagpabilin sa area.
Apan kahibaluan nga gisupalpal kini ni Pangulong Duterte sa iyang pagpamulong sa Lagao Gym, ug gibutyag nga angayan nang maundang ug mapasirad-an sa labing daling panahon ang operasyon sa KAPA.
Ug gani, gipamalikasan pa mismo ug gibaharan ni Duterte si Apolinario gumikan sa gihimo niining pagpangilad sa ilang mga miyembro o investors.
May pipila pa sa mga miyembro ang nagkanayon nga daw na-Miss Colombia sila, human nga gipalaum lamang sa fake news, sama sa nahitabo kaniadto sa kandidata sa nasampit nga nasud sa Miss Universe 2015 kung asa ang gideklarang tinuod nga midaog mao ang pambato sa Pilipinas nga si Pia Wurtzbach.
