Makapamalit na usab og baratong bugas nga nagkantidad ₱20 kada kilo ang mga minimum wage earners sa nasud.
Kini human magkasabot ‘in principle’ ang Department of Agriculture (DA) ug ang Department of Labor and Employment (DOLE) nga lakipon ang mga minimum wage earners sa pilot run sa ₱20 rice program sa gobyerno.
Personal nga mibisita si Labor Secretary Bienvenido Laguesma kang Agriculture Secretary Francisco P. Tiu Laurel Jr. sa buhatan sa DA sa Quezon City, aron pasalamatan siya sa pag-apruba sa hangyo nga maapil ang mga trabahante nga minimum wage earners sa maong subsidized rice program.
Gilauman sa DA nga maka-access na ang mga kwalipikadong trabahante gikan sa mga partisipanteng kompanya sa ₱20 rice program pagsugod sa Hunyo.
Pinaagi sa maong programa, gitugotan ang National Food Authority (NFA) nga mupalit og dugang nga bugas gikan sa mga lokal nga mag-uuma.
Sa sinugdanan, ang maong baratong bugas gibaligya lamang sa mga Kadiwa Stores para sa mga kabus kon indigents, senior citizens, solo parents, ug Persons with Disability (PWDs).
