GENERAL SANTOS CITY – Gikatakda nga makadawat og mga hinabang ang mga mag-uuma nga apektado sa mga pagbaha nga natigayon tungod sa nasinatiang mga pag-ulan sa nakalabay nga mga adlaw.
Matud pa ni Arlan Mangelen, regional director sa Department of Agriculture-12 nakig-alayon na ang ilang buhatan sa nagkadaiyang lokal nga gobyerno sa Region 12 nga apektado sa nasampit nga kalamidad aron matabangan ang mga mag-uuma.
Gibutyag sa opisyal, manghatag ang ilang buhatan og mga binhi sa palay sa mga mag-uuma human nga gilunopan sa tubig-baha.
Gikadugang pa ni Mangelen nga gipatutukan usab ang insurance sa mga pananum sa mag-uuma kung asa ginahulat pa ang mga dokumento nga gikan sa LGU.
Kini aron maproseso kung unsa man ang mga panginahanglanon nga angayang ihatag sa ilang buhatan sa mga apektadong residente ilabina sa North Cotabato og uban pang lugar nga grabeng naapektuhan.
Nasayrna nga siyam ka mga munisipyo sa North Cotabato ang apektado sa pagbaha.
