Gikumpirma sa anti-organized crime commission nga adunay mga langyaw nga nagapalit ug nagarenta ug mga kayutaan sa pipila ka probinsya sa nasud.
Matud kang Presidential Anti-Organized Crime Commission (PAOCC) USec. Gilbert Cruz ginasusi na nila ang naasoy nga insidente kung asa wala lamang nahitabo sa Palawan apan lakip sa ubang probinsya sama sa Nueva Ecija ug sa mga probinsya nga ang nag-unag produkto ang bugas.
Ginahimo matud pa nila ang pag renta sa yuta sa kantidad nga otsenta mil matag ektarya.
Matud niini mamahimo nga makontrol sa mga dayuhan ang food security sa nasud kung ang tanan nga gitamnan ug humay ang ila ng narentahan gumikan sila na unya ang may kontrol sa presyo sa bugas.
Samtang nakiglambigit na ang anticrime body sa gobyerno sa Department of Agriculture ug Department of Interior and Local Government kalabut sa maong isyu.
Kini human ang panawagan sa Catholic Bishop Conference of the Philippines sa gobyerno nga imbestigahan ang mga dayuhan nga nagapalit ug mga kayutaan sa Taytay Palawan.
Sa kasamtangan sa batakang balaud sa nasud limitado ang pagpanag-iya sa mga pribado nga kayutaan para lamang sa mga Filipino o koporasyon nga panag-iya sa mga Filipino nga may 60% nga capital stock.
