Nagpabiling dili andam ang kadaghanan sa mga miyembro sa Sangguniang Panlungsod sa General Santos City sa pagbalik sa ilang mga opisina human kini maapektuhan sa magnitude 7.8 nga linog niadtong Hunyo 8.
Una nang gisugyot ni Konsehal Franklin Gacal Jr. nga temporaryong gamiton sa konseho ang pasilidad sa City Engineer’s Office sa Barangay Buayan samtang ginapaayo pa ang SP Building.
Apan, sumala sa City Engineer’s Office, dili posible nga hingpit nga maangkon sa konseho ang maong pasilidad tungod sa kakulang sa area ug gisugyot nga tungaon kini tali sa duha ka opisina.
Mibabag si Konsehal Ramon Milleza sa maong plano ug miingon nga dili siya mouyon niini kon dili masiguro ang kaluwasan sa mga konsehal ug empleyado.
Tungod sa kabalaka sa seguridad, ilabina kay adunay mga senior citizen ug PWDs sa konseho, nagpabilin ang ilang baruganan nga dili mobalik sa nadaot nga building hangtod dili pa kini mapamatud-ang luwas gamiton.
Padayon karon ang pagpangita sa lokal nga kagamhanan og haum nga temporaryong opisina aron mapadayon ang serbisyo ug mga kalihokan sa konseho.
