SARANGANI – Gidayeg sa katawhan ang natigayon nga selebrasyon sa Sarbay Festival 2023 tungod gawas nga nagmalampuson ang pagsaulog niini, wala pa’y duha ka adlaw limpyo na ang Gumasa Beach sa Glan, Sarangani Province diin didto nahimutang ang main venue sa nasampit nga festival o mas naila nga SarBay Festival 2023 nga usa ka labing dako nga beach festival sa nasud.
Kahibaluan nga gidagsa na kini ug katawhan sa unang adlaw pa lang hangtod sa nahuman kini kaniadtong milabayng adlaw, Mayo 27, 2023 hinungdan nga dili jud malikayan nga adunay magkatag nga basura pagkahuman sa kalingawan.
Apan, madasigon nga miaksyon ang Provincial Government sa Sarangani Province ug nakahimo sila sa pagpangandam alang sa pagdaghan sa basura pagkahuman sa selebrasyon.
Mipaabot usab si Municipal Mayor Vic Paul M. Salarda, MPA sa iyang pasalamat ang provincial government sa Sarangani sa padayon nga adbokasiya niini sa konserbasyon sa Sarangani Bay Protected Seascape.
