Suportado sa Philippine National Police ang rekomendasyon sa Department of Interior and Local Government nga kunhuran ang ihap sa high ranking officials sa ilang organisasyon.
Gibutyag ni PNP spokesperson Police Brigadier General Jean Fajardo nga dugay nang mihangyo ang ahensiya nga e-rebyo ang ilang old model sa gabayan sa pagsaka’g ranggo sa ilang mga opisyales.
Una niini, girekomendar ni DILG Secretary Jonvic Remulla kang Presidente Bongbong Marcos nga gikan sa dul-an 133 ka mga heneral sa nasud, himoon nalang kining 25.
Nagtoo si Remulla nga igo na ang 25 ka heneral aron bantayan ang 18 ka rehiyon sa nasud, ug huptan ang pito ka mga importanteng units sa ilang organisasyon.
Subay sa nakuhang data sa BOMBO News Team, ang binulan nga suhulan sa usa ka police general muabot sa 149,000 pesos.
Samtang ang police lieutenant general mukobra sa 125,000 matag bulan.
Ang police major general adunay 102,000 monthly wage, samtang ang police brigadier general mudawat sa 91,000 pesos matag bulan isip ilang suhulan.
Wala pay labot sa maong kantidad ang ilang mga benepisyo segun sa nakalatid sa Section 71 sa RA 6975. Kini nga mga benepisyo gilangkoban sa Quarter Allowance, Clothing Allowance, Regular Subsistence Allowance, Hazard Pay, Laundry Allowance, Personnel Economic Relief Allowance, Gratuity allowance nga mubalor sa 20,000, Collateral Pay and Allowances, Hospital Subsistence Allowance, Civil Disturbance Control Subsistence Allowance, Training Subsistence Allowance,Combat Duty Pay nga mubalor sa 3,000 pesos,Combat Incentive Pay nga mubalor sa 300 pesos per day operation, Hazardous Duty Pay, Radiation Hazard Pay,Incentive Pay,Specialist Pay, Flying Pay, Sea Duty Pay, Capital Region Command Incentive Pay, Special Clothing Allowance, ug Cold Weather Clothing Allowance.
Sa pag-entrada sa PNP ang usa ka patrolman o patrol woman adunay suhulan nga dul-an 30,000 pesos matag-bulan.
