Misupak ang dagkong grupo sa negosyo nga nagrepresenta sa Philippine outsourcing sector sa plano sa Estados Unidos nga ibalik sa ilang nasud ang mga trabaho sa customer service.
Matud sa mga grupo, dili patas ang maong lakang tungod kay gipunting niini ang lehitimong offshore operations bisan wala’y klarong ebidensya nga maoy hinungdan sa mga problema sa mga konsumidor.
Sa ilang position paper nga gipetsahan kaniadtong Mayo 18, ilang gisumite sa Federal Communications Commission (FCC) nga ang gisugyot nga mga regulasyon mahimong adunay dakong epekto sa operasyon ug ekonomiya apan wala’y klarong benepisyo alang sa mga konsumidor.
Lakip sa mipirma sa komento ang IT and Business Process Association of the Philippines (IBPAP), American Chamber of Commerce of the Philippines (AmCham), ug US-ASEAN Business Council (USABC).
Kini human nagpagawas ang FCC kaniadtong Marso og Notice of Proposed Rulemaking aron tun-an ang mga lakang nga makapadasig sa mga kompanya nga ibalik ang call center jobs ngadto sa US ug mapaayo ang customer service sa mga pasilidad nga naa didto.
