GENERAL SANTOS CITY – Mapasalamaton ang mga ginikanan nga nasuspendi ang mga klase tungod sa kainit sa panahon.
Una ng gibutyag ni Carlos Susarno, Assistant Schools Division Superintendent sa DEPED Gensan nga nagpagawas na sila ug memorandum nga ang principal sa mga tulunghaan sa syudad pwede nga mag-suspend ug face-to face classes ug temporaryo una nga ipatuman ang modular distance learning samtang taas pa ang heat index o nasinatiang kainit sa panahon.
Nasayran nga kagahapong adlawa gikan sa 116 ka tulunghaan sa Gensan, anaa sa 14 niini ang nagpatuman og blended learning.
Tumong niini aron nga malikayan nga ma-expose sa tumang kainit ang mga estudyante.
Giklaro usab ni Susarno, magdepende na sa mga principal kung pila ka adlaw ang ilang ideklarang suspension of face-to-face-classes depende matud pa sa dagan sa panahon.
Ang maong kamanduan ang subay sa gipagawas nga DEPED Memorandum OASOPS no. 2023-077 (Reiteration of the implementation of modular distance learning as provided in DEPED Order no. 037, s. 2022) pinitsahan ug April 20, 2023.
Unod sa DEPED Order no. 37 mao ang “Guidelines on the cancellation or suspension of classes and work in schools in the event of natural disasters, power Outages/Power interruptions, and other calamities”.
