GENERAL SANTOS CITY – Resulta na lamang ang gipaabot sa taga National Bureau of Investigation (NBI) sa gipahigayon nga auditing sa pundo nga nawala sa Barangay Poblacion Alabel Sarangani Province.
Kini ang pahayag ni Kapitan Coling Lacaba human nagpahigayon ug pagsusi ang Commission on Audit (COA) dungan sa pagkawala sa ilang treasurera nga si Evelyn Bagalay nga padayon nga nagtago human gisibat ang pundo sa ilang barangay.
Matud ni Kapitan Lacaba nga sukad niadtong bulan sa Nobyembre sa miaging tuig nagpait na ang ilang sitwasyon tungod wala nay sweldo nga nadawat apil ang mga benefits ug allowance tungod halos natilok ang pundo sa pagpunay ug cash advance sa ilang tresurer.
Matud niini nga hangtud karon dili pa masulti ang ensakto nga kantidad sa salapi ang nakuha sa nahisgutang tresurera.
Hinuon gipaklaro niini nga wala nahilabtan ang pundo alang sa tuig 2022.
Gani nagpatabang na sila sa munisipyo alang sa ilang inadlaw- adlaw nga ginbuhaton .
Gisaysay usab niini nga nalubong na sa pagpangutang ang uban nga empleyado tungod walay sweldo nga nahatag kanila.
