GENERAL SANTOS CITY – Gidagsa sa mga debotong Katoliko ang mga simbahan dinhi sa dakbayan alang sa pagsaulog sa Pasko sa Pagkabanhaw.
Mahinongdanon ang Easter Sunday alang sa mga Kristiyanos gumikan kay karong adlawa nabanhaw si Hesus sa ikatulong adlaw human Siya mamatay sa krus sa Biyernes Santo.
Alayun sa pasko sa pagkabanhaw, natigayon ang gitawag nga sugat o tagbo sa pipila kaganihang alas 4:00 sa sayo sa buntag.
Gisundan kini ang pagsabwag sa mga bata nga nagsinena og pang-anghel ug mga gihay sa bulak kon asa gisalo sa mga nagsimba.
Gisundan kini og misa nga nagsugod og alas 5:00 sa kaadlawon.
Puno ang mga simbahan sa Santo Niño Bula Parish Church, Saint Peter and Paul parish Church sa Lagao, OLPGV og St. Michael the Archangel Parish.
Ug gani, ang uban ang anaa na sa gawas naglingkod gamit ang gibitbit nilang lingkuranan. Alayun niini, hugot nga seguridad ang gipatuman sa ma pulis og sundalo kaabag ang barangay tanod.
Ang Dominggo sa Pagkabanhaw gisaulog isip sinugdanan sa bag-ong kinabuhi human gitugyan ni Hesus ang Iyang kinabuhi aron pagtubos sa katawhan gikan sa mga sala.
Ang Easter Sunday mao ang nagtapos sa Kwaresma, ang 40 ka adlaw nga pagpuasa, paghinulsol ug pagpugong sa kaibog isip pagtimaan sa pag-antos ug pagkamatay ni Hesus.