GENERAL SANTOS CITY -Wala kaayo tagda sa mga katawhan sa Tupi, South Cotabato, ang nasinatiang pag-ulan ug yelo sa ilang lugar kaniadtong Dominggo sa hapon, Hunyo 25, inay ang makusog nga hangin nga nagmugna ug ipu-ipo.
Matud ni Mayor Reynaldo Tamayo Jr., kanhi na nila kining nasinatian apan sa mga uma kaniadto. Ug miaging adlaw, sa national highway matud pa miagi ang ipu-ipo, kung asa dul-an sa 30 ka mga street lights ug mga centennial nga punuan sa kahoy ang naigo ug nangaibot.
Hinuon, gawas sa nasampit nga kadaot, manageable lamang matud pa ang mga natala nga kadaot sa mga panimalay ug mga establisyimento.
Nagpasalamat usab si Mayor Tamayo nga paspas nga milihok ang mga hingtungdang ahensya sa gobyerno ug paspas nga napahigayon ang clearing operation nga gipangunahan sa lokal nga panggamhanan.
Hinungdan nga pagkagabii, nabalik na gilayon ang kadaghanan sa mga suga, ug pagkabuntag hingpit nga nahuman ang clearing operations.
Sumala pa nga gawas sa mga nangaibot nga kahoy nga minilyon ang kantidad, mukabat matud pa sa P250,000 ngadto sa P300,000 ang damyos gumikan sa mga streetlight nga nadaot, gawas sa anaa sa upat ka mga balay nga nakatala ug minor nga guba.
