Gisugyot sa Department of the Interior and Local Government (DILG) ang posibilidad sa hingpit nga pagdili sa mga online video game nga grabe ang kabayolente. Matod ni DILG Secretary Jonvic Remulla, ang Kongreso ug ang mga may kalabutan nga ahensya sa gobyerno kinahanglan pagatun-an ang maong sugyot aron mapanalipdan ang mga kabatan-onang Pilipino.
Misunod kini sa mga report nga ang usa sa mga suspek sa pagpamusil sa usa ka eskwelahan sa Tacloban City gituohang naadik sa usa ka online game nga gitawag og “GoreBox.”
Sumala sa Cybercrime Investigation and Coordinating Center (CICC), ang GoreBox usa ka dula nga nagtugot sa mga magdudula sa paggamit og mga armas ug paghimo og nagkadaiyang senaryo nga adunay kalabotan sa kapintasan.
Tungod niini, temporaryong gibabagan sa CICC ang access sa maong online game sa Pilipinas samtang gisusi pa ang posibleng epekto niini.
Giingon usab sa DILG nga mahimo usab ikonsiderar ang susamang lakang batok sa uban pang online games nga adunay parehas nga sulod.
Matod pa ni Secretary Remulla, ang kanunay nga pagtan-aw o pagdula og bayolente nga content mahimong adunay epekto sa panghunahuna ug pamatasan sa mga kabatan-onan, busa kinahanglan kini tun-an pag-ayo.
Bisan pa niini, nagpadayon gihapon ang diskusyon sa mga eksperto kon unsa ba kadako ang direktang epekto sa violent video games sa aktuwal nga kinaiya sa usa ka tawo, tungod kay adunay uban pang mga hinungdan nga mahimong makaapekto sa pamatasan sa kabatan-onan.
