GENSAN – Mga batang sukarap ang gituuhang mitigbas-patay sa commercial sex worker nga nakaplagan sa sagbutang bahin sa likod sa Mindanao Medical Center kagahapong adlawa.
Hugtanon kining gikondena ni Kag. Lourdes Casabuena, kung asa hilabihan matud pa ka brutal ang pagpatay sa biktima nga giilang si Mary Ann Sahul.
Gikumpirma ni Casabuena nga ang maong babaye mao kadtong makapila ka higayon nga gi-rescue kaniadto sa barangay, gumikan ginauban ang gamay’ng anak sa pagpangita ug customer.
Nakig-alayon na matud pa si Casabuena ngadto sa mga otoridad aron mas palawman pa ang imbestigasyon sa pagpatay sa biktima.
Nanawagan usab ang nasampit nga opisyal ug hinabang sama sa lungon, alang sa pamilya sa biktima nga naglisod matud pa.
Kahibaluan nga walay nakita nga timilhan nga gilugos ang biktima, apan may upat kini ka samad-tinigbasan sa lawas nga maoy hinungdan sa iyang hinanaling kamatayon.
