GENERAL SANTOS CITY – Malaumon nga magamit na ang mga bag-ong traffic lights sa dakbayan una ang December 16, 2019 human mipasalig ang contructor sa City Engineers Office.
Kini ang gibutyag ni Engr. Emerald Signar usa ka semana una ang naasoy nga petsa.
Kini ang mga traffic lights nga nahimutang sa Santiago Blvd. corner J. Catolico Avenue lakip na sa Block 8 sa City Heights ug Purok Malakas, Brgy. San Isidro.
Nasuta nga pipila ka bulan usab nga nalangan ang pagtrabaho sa nahisgutang mga proyekto human nagkaproblema ang contructor nga taga Luzon.
Gikumpirma usab ni Engr. Signar nga magpatuman ug mas istriktong patakaran ang dakbayan sa pagdawat og mga contractor human nadelatar ang daghang proyekto sa syudad aging mga bulan.
Kini human nagmugna si Gensan Mayor Ronnel Rivera og contractor evaluation system nga mudetermina sa kontraktor nga muapil sa bidding nga mupahigayon sa contract termination review aron i-blacklist ang mga contractor nga adunay dili maayong record.
