GENERAL SANTOS CITY – Karong adlaw ang gikatakdang biyahe sa mga atleta sa Region 12 alang sa Palarong Pambansa.
Matud ni Jojo Duhilag, ang DepEd 12 sports coordinator, manukad ang mga atleta sa South Cotabato kon asa gipahigayon nila ang pila ka semana nga training.
Musakay sila og bus paingon sa Cagayan de Orob ug pag-abot sa maong lugar, adunay naghulat nga barko kanila aron maoy sakyan paingon sa Antique kung asa matigayon ang Palaro.
Gibutyag ni Duhilag, nga anaa sa kondisyon na ang mga atleta apan may usa pa ka semana ang mga nasampit alang sa ilang pagbansay sa venue.
Nasayran nga ang Palarong Pambansa ang magsugod sa Abril 23 hangtod 29, 2017.
Una nang gibutyag ni Duhilag nga dako ang tiyansa sa Region 12 nga makasungkit ning tuiga ug daghang gold medal gumikan daghang mga atleta ang adunay potensyal sa ilang tagsa-tagsa ka sports event nga gisalmotan.
Gipasigarbo nila ang mga atleta sa billiard, baseball, boxing, taekwondo lakip na ang gymnastics.
