Nabahin ang upat ka kanhing mahistrado sa Supreme Court bahin sa 16-vote threshold o gikinahanglang boto aron ma-convict ang usa ka impeachable official.
Una nga giimbitar sa impeachment court sila kanhing CJ Artemio Panganiban, kanhing CJ Reynato Puno, kanhing Associate Justice Adolfo Azcuna, ug kanhing CJ Hilario Davide Jr. aron mohatag sa ilang tagsa-tagsa ka panan-aw ug ‘legal opinion’ bahin sa maong isyu.
Gibasa sa impeachment court ang legal memorandum ni kanhing Chief Justice Hilario Davide Jr. diin iyang gipaklaro nga ang mga pulong nga ‘all the members of the Senate’ nagtumong lamang sa mga senador nga adunay pisikal ug legal nga kapasidad nga makaapil ug makabotar.
Giinsistir niya nga dili apil sa pagkwenta sa ‘threshold’ ang mga miyembro nga ni-resign na, natangtang sa puwesto, adunay grabe nga sakit sa pangisip o lawas, nagtago gikan sa balaod, ug anaa sa gawas sa nasod.
Dili usab matod niya dapat iapil sa pagkwenta ang mga senador nga adunay ‘legal impediments’, lakip ang mga giatubang nga kaso nga plunder ug paglapas sa Anti-Graft and Corrupt Practices Act, ingon man ang mga napriso o nagsilbi na og sentensya.
Sa pag-atubang ni kanhing Supreme Court CJ Artemio Panganiban, usa sa iyang importanteng pangutana mao kung husto ug patas ba nga tugotan ang mga senador nga mobotar bisan absent sila, nagtago, anaa sa abroad, detained, o adunay sakit?
Pangutana pa sa kanhing Punong Mahistrado, patas ba nga tugotan silang mobotar bisan wala nila ma-access ug masusi ang mga dokumento, wala nila madungog ang mga testimonya, ug wala man lang nila naobserbahan ang lihok sa mga saksi?
Samtang, gibarugan ni kanhing Supreme Court Chief Justice Renato Puno nga mahimo gihapon nga mohatag o mohimo og judgment ang usa ka judge bisan wala niya personal nga nakita o nasusi ang lihok o demeanor sa mga saksi o sa akusado.
Gihimong pananglitan sa kanhing Punong Mahistrado ang usa ka judge sa Regional Trial Court o RTC nga mipuli sa usa ka judge nga miretiro o gibalhin sa laing puwesto.
Matod ni CJ Puno, mahimo nga mohimo og desisyon o mohatag og judgment ang mipuli nga judge sa mga kaso nga nadungog sa iyang gipulihan nga judge.
Matod pa niya, mahimong tan-awon, basahon o paminawon sa maong judge ang record sa korte aron magiya siya sa paghimo sa iyang desisyon.
Pabor usab si retired Associate Justice Adolfo Azcuna nga tugotan nga mobotar ang mga senador nga wala makatambong sa tanang adlaw sa trial.
Rason sa kanhing mahistrado, kinahanglan gihapon silang tugotan nga mobotar tungod kay adunay kaugalingong record ang tribunal diin natala ang tanang proceedings, ug mahimo kining balikan, tan-awon ug susihon sa mga senator-judge.
Kinasing-kasing nga mapasalamaton ang Senate Impeachment Court sa presensya ug paghatag og legal opinion sa mga kanhing mahistrado sa Korte Suprema bahin sa 16-vote threshold.
Human sa presentasyon sa upat ka kanhing mahistrado, nagdeklara si Trial Presiding Officer Sen. Chiz Escudero og mubo nga recess aron ‘ma-digest’ ang iyang giingong daghang impormasyon nga gihatag sa mga legal luminary ngadto sa impeachment court.
Giingon ni Sen. Chiz nga dako ang nakat-unan sa tanan nga anaa sa korte human madungog ang legal opinion sa mga kanhing mahistrado.
