Anaa sa taas nga alerto ang Department of Energy (DOE) sa posibleng hoarding ug profiteering sa pagbaligya sa mga produktong petrolyo taliwala sa sunod-sunod nga pagsaka sa presyo sa lana.
Kini human ang mga field office sa DOE sa Luzon ug Mindanao nagsumite og inisyal nga mga report ug pipila ka ebidensya nga nagpakita sa posibleng mga iregularidad sa suplay sa gasolina ug mga pamaagi sa retail.
Sumala sa DOE, ang ahensya nag-verify sa maong mga report isip kabahin sa pag-andam sa kaso.
Ang DOE nangayo usab og tabang sa Department of the Interior and Local Government (DILG) ug sa Philippine National Police (PNP) aron masiguro ang hinanaling aksyon batok sa mga mapamatud-an nga nakalapas sa balaod.
Gipasabot ni DOE Secretary Sharon Garin nga ubos sa Price Act ug Presidential Decree No. 1865, ang hoarding, overpricing ug uban pang manipulasyon sa presyo ug suplay sa lana ilegal ug masilotan og multa ug pagkabilanggo.
Ang kalihim nagpasidaan nga ang gobyerno dili motugot sa bisan unsang matang sa pagpahimulos, labi na karon nga adunay krisis sa Middle East.
