GENSAN – Walay angay ikabalaka ang katawhan sa milutaw nga balita nga mawala na ug dili na magamit ang Meta nga kaniadto nailhan isip Facebook.
Gipasabot ni Avel Manansala, usa ka Google Local Guide Advocate, nga sayop ang pagsabot sa pipila ka netizens nga mawagtang na gyud ang Messenger sa tanang plataporma.
Matud ni Manansala, tinuod nga ang Meta Platforms mag-undang sa stand-alone nga Messenger website ug desktop application sugod sa Abril 2026.
Kini nagpasabot nga ang mga gumagamit nga mo-access sa Messenger pinaagi sa messenger.com o pinaagi sa desktop app sa laptop ug personal computer dili na makagamit niini pagkahuman sa maong petsa.
Apan klaro ang pahimangno nga dili kini nagpasabot nga mawagtang ang Messenger sa mobile phones.
Ang Facebook Messenger mobile application sa iPhone ug Android magpadayon gihapon sa normal nga operasyon.
Ang mga user nga naggamit sa smartphone apps dili maapektohan ug magpadayon sa pagpadala ug pagdawat og mensahe sama sa ilang naandan.
Sa simpleng pagkasulti, ang desktop o laptop version sa Messenger, lakip ang messenger.com ug desktop app, ang mawagtang sugod sa Abril 2026.
Samtang ang mobile apps sa iOS ug Android magpabiling aktibo ug magamit gihapoon sa tanang rehistradong user.
