Malampuson nga nakahatag og Mental Health and Psychosocial Support Services (MHPSS) ang buhatan sa City Health Office ngadto sa mga bakwit o evacuees sa dakbayan.
Sumala pa ni Dr. Lalaine Calonzo, ang Department Head sa City Health Office (CHO) sa General Santos City, moabot sa kapin 425 ka mga evacuees gikan sa lima (5) ka mga barangay ang nakadawat niining maong serbisyo o nailhan usab nga psychological first aid.
Gihimo kini aron matabangan ang mga pamilya nga nakasinati og kahadlok o trauma human sa makusog nga linog.
Kini nga lakang nahatag pinaagi sa pagtinabangay sa uban pa nga mga ahensya. Alang naman sa mga biktima nga wala sa mga evacuation center apan nakasinati gihapon og kakuyaw o kalisang, gibutyag ni Dr. Calonzo nga andam ang ilang 11 ka mga Rural Health Units (RHU) sa pagtabang.
Ang maong mga RHU adunay mga doktor ug nars nga bansay ug preparado sa paghatag og mental health services.
Gidugang usab niya nga adunay 12 ka RHU ang siyudad, apan ang usa niini nga anaa sa Labangal temporaryo unang gipailalom sa restricted use.
