Gipasabot sa City Health Office nga walay usa ka espesipikong pamaagi aron mapugngan ang suicide apan gilauman nga pinaagi sa tinud-anay nga komunikasyon ug pagpakabana sa mental health, mapahugtan pa ang pagsabot sa kahimtang sa mga tawo nga nag-antos sa depresyon ug ubang emosyonal nga kabug-at.
Kini ang gipahibalo ni Dr Lalaine Calonzo Department Head sa City Health Office sa Gensan nga nagkanayon nga ang pag-atubang sa isyu sa suicide kinahanglan nga usa ka kolektibong responsibilidad tali sa pamilya, komunidad, ug mga institusyon sa panglawas
Matod pa ni Dr Calonzo nga ang unang lakang mao ang pagpaminaw ug pagpakita sa pagtagad sa mga tawo nga adunay mga timailhan sa kabalaka, kapoy sa kinabuhi, o pagkawalay gana sa kalibutan Gikinahanglan usab nga mabati nila nga aduna silay kasandigan ug adunay nag-atiman kanila
Dugang pa ni Dr Calonzo nga padayon ang programa sa City Health Office alang sa mental health awareness pinaagi sa mga information drive, counseling services, ug pagtabang sa mga barangay health workers aron mas mapalawom ang pagsabot sa katawhan bahin sa mental health
Nagpahimangno usab ang CHO nga ang pagpakig-istorya sa mga eksperto ug sa pamilya dili kahuyang kundili usa ka kusog nga lakang aron malikayan ang posibilidad sa suicide Ug gidasig ang tanan nga dili magpanuko sa pagpangayo og tabang kung gibati ang grabe nga kasubo o kagubot sa hunahuna
