GENSAN – Nakipagtagbo si Melai Cantiveros-Francisco uban ang Laro Tayo Team kang City Mayor Lorelie Geronimo Pacquiao sa City Mayor’s Office kanaidtong Sabado, Disyembre 27, aron pormal nga mangayo og pagtugot ug permit alang sa shooting sa ilang espesyal nga episode sa Tiongson Street.
Ang maong episode sa ilang show nagtumong sa pagpasigarbo sa nindot nga kultura, kadasig, ug kinaiyahan sa katawhan sa Gensan pinaagi sa lain-laing lingaw nga dula ug makalingaw nga eksena.
Malipayon ug mainiton nga gidawat sa Mayor ang grupo ug naghatag kini og kasadya, ilabi na sa presensya ni Melai nga nailhan sa iyang komedya ug makalingaw nga personalidad.
Gilauman nga kini nga aktibidad maghatag ug dugang kasadya sa mga Generals ug mopakita sa daghang turista ngano nga ang GenSan usa ka dakbayan nga puno sa kalingawan.
