GENERAL SANTOS CTY – Hugot ang panawagan ni Mayor Vic Paul Salarda sa Alabel, Sarangani Province sa katawhan nga magtinabangay sa kampanya batok sa African Swine Fever (ASF).
Kini human nga gipatay ang kapin sa 50 ka mga baboy sa Sitio Kisoy, Datal Anggas, Alabel, Sarangani Province human nagpositibo sa maong virus.
Sumala pa sa nasampit nga opisyal nga human nasayran nga adunay kaso sa ASF sa maong lugar dayon giadtu-an aron mahatagan ug aksyon.
Matud niini kadtong mga nanag-iya sa baboy ang makadawat ug bayad gikan sa gobyerno.
Gikadugang pa niini nga hatagan usab sa LGU- ug tag-usa ka sako sa bugas ang mga nanag-iya sa baboy nga napailawom sa culling.
Gibutyag nga ang lugar nga apektado sa ASF ang mas duol sa Malita, Davao Occidental nga unang may natala na sa kaso sa nasampit nga virus.
Kahibaluan nga ang Alabel ang ikaduhang munisipyo sa Sarangani nga may natala nga kaso sa ASF pagkahuman sa Glan.
