POLOMOLOK- Mipasalamat si Polomolok Mayor Bernie Palencia sa mga magtutudlo sa lungsod tungod sa ilang padayong sakripisyo ug serbisyo alang sa edukasyon sa mga kabatan-onan, ilabina sa umaabot nga World Teachers’ Day.
Matud ni Palencia, dakong papel sa mga magtutudlo ang paghulma sa kaugmaon sa mga kabatan-onan pinaagi sa paghatag og kalidad nga edukasyon ug pag-andam kanila aron mahimong maayong mga propesyonal ug responsableng miyembro sa komunidad.
Gipasalamatan usab sa mayor ang mga magtutudlo sa ilang pagpadayon sa pagserbisyo bisan pa sa mga hagit nga giatubang sa komunidad, lakip na ang kusog nga linog nga nakaresulta og kadaot sa mga imprastraktura ug nakahatag og trauma sa daghang estudyante.
Samtang, iyang gipasidunggan ang mga magtutudlo sa ilang padayong paggiya sa mga estudyante atol sa mga bag-ong hulga sama sa school shooting ug mga dili maayong impluwensya sa social media.
Dugang pa ni Palencia nga dili lamang mga magtutudlo ang adunay responsibilidad sa paggiya sa mga kabatan-onan, kundili apil usab ang mga ginikanan nga unang motutok ug mogiya sa ilang mga anak.
Gipasiguro sa lokal nga pangagamhanan sa Polomolok ang padayong suporta niini sa Department of Education ug sa tanang magtutudlo sa lungsod, gikan sa pampubliko hangtod sa pribadong mga tulunghaan.
