GENSAN– Mibisita si Mayor Lorelie Pacquiao sa Acharon Sports Complex niadtong miaging mga adlaw aron personal nga susihon ang padayon nga pag-ayo ug preparasyon sa mga pasilidad alang sa umaabot nga Batang Pinoy 2025 National Tournament nga ipahigayon sa Dakbayan sa General Santos karong Oktubre 25 hangtod 31, 2025.
Atol sa iyang pagbisita, gibantayan ni Mayor Pacquiao ang mga ginahimong renovation ug improvement works sa sports complex lakip na ang athletic field ug bleachers, aron masiguro nga andam ug hapsay ang pasilidad sa pagsugod sa nasudnong sporting event.
Gipasabot sa mayor nga ang Batang Pinoy 2025 usa ka dakong oportunidad para sa Gensan aron ipakita ang kapasidad sa syudad sa pag-host sa mga dagkong kalihukan ug sa pagpasidungog sa mga kabatan-onan nga atleta gikan sa lain-laing rehiyon sa Pilipinas.
Gimandoan usab ni Mayor Pacquiao ang mga nagdumala sa proyekto nga tapuson ang tanang preparasyon sa tukmang oras ug siguruhon nga luwas, limpyo ug kumpleto sa pasilidad ang Acharon Sports Complex sa dili pa magsugod ang kumpetisyon.
