Human mi-resign sa Commission for Infrastructure (ICI), isip special adviser, si Baguio City Mayor Benjamin Magalong gipanghimakak niini ang mga pasangil nga naglambigit siya sa kurapsyon sa dakbayan.
Sa usa ka pamahayag kaniadtong Sabado, si Magalong niingon nga lisod ang iyang desisyon sa pagbiya sa ICI apan gikinahanglan niya kini aron mamintinar ang kredibilidad sa komisyon.
Dugang pa sa mayor nga wala siyay labot sa mga kuwestiyonableng proyekto ug walay “conflict of interest” sa iyang pagkatudlo sa ICI.
Kauban sa pag-resign, gikataho ang pagkalambigit ni Magalong sa duha ka proyekto sa imprastraktura sa Baguio City kaniadtong 2022 kauban ang magtiayong kontraktor nga sila Pacifico ‘Curlee’ ug Cezarah ‘Sarah’ Discaya.
Kalabot niini, gisuspenso usab ni DPWH Secretary Vince Dizon ang unom ka mga opisyal sa Baguio District Engineering Office.
Una nang nimando si Magalong og bulag nga imbestigasyon sa Baguio City Council alang sa nalangan nga mga proyekto sama sa tennis court ug parking lot sa Burnham Park.
Kahinumduman nga si Magalong gitudlo sa komisyon niadtong Septiyembre 13 ni Presidente Ferdinand Marcos Jr., uban nila ni kanhi Supreme Court Justice Andres Reyes Jr., kanhi DPWH Secretary Rogelio “Babes” Singson, ug SGV executive Rossana Fajardo.
Wala pay opisyal nga pahayag si Presidente Marcos bahin sa pag-resign, apan gitawag kini sa iyang press office nga “makapasubo.”
Sa kataposang pamahayag ni Magalong, nanawagan si Magalong sa mga Pilipino nga dili tugotan nga kawaton sa mga kurakot nga opisyal ang kaugmaon sa kabatan-onan ug kaugmaon sa nasud.
